Thursday, February 9, 2017

এগ্গো মানজে তা হুরোল-আন আহজেইএ

চীন দেজঅর এগ্গো পজ্জন। ভালকদিন বজর আগঅর লেঘা। বুওএই নাঙে একজনে ২২০০ বজর আগে এ গল্পবো লিক্কে।শিক্কে ল’বার মতঅ গল্প।
তা হুরোলআন আহজেইনেই ত্যা বেগঅরে সন্দেহ গরে
এগ্গো মানজে গাচ তা হুরোলআন আহজেইএ। হুরোল্ত্যআনদোআ ত্যা দারবো গাচ কাবিদঅ। তা হুরোলআন ত্যা ভালক জাগাত তোগেই চেলঅ। হালিক ন পেলঅ। কুদু ফেলেই ইচ্চে না কন্না চুর গুরি তা হুরোলআন নেজেইএ সিআন লোইনেই ত্যা চিদে গুরি চেলঅ। তা ঘরঅ কুরে এগ্গো গিরে থেদঅ। তারার এগ্গো গুরো শঅ এলঅ। আদিক্কেগুরি ত্যা তা ঘরঅ কুরে গুরো শঅবোরে দিঘিলঅ। তা মনান ভজমান সন্দেহ সন্দেহ গুজ্জে মন এলঅ। ত্যা মনে মনে সন্দেহ গুরিলঅ, তা ঘরঅ কুরে এ গুরো শ’বো-ই তা হুরোলআন চুর গুজ্জে। সিত্তুন ধুরি ত্যা সে গুরো শ’বোরে সন্দেহ চোঘে চে’দঅ। ত্যা দিঘিদঅ বা চিদে গত্ত, গুরো শ’বো চেহারাআনঅ চুরঅ ধক, আহদেদেও চুরঅ ধক, কধা কয়দেও চুরঅ সা’আন। ত্যা দিন দিন তারে সন্দেহ চোঘে চাআ ধল্লঅ।
হালিক কিজুদিন পরে ত্যা ঝারঅত জেইনেই  ত্যা হুরোলআন পেলঅগোই। মোনো মাধাত জিদু ত্যা গাচ কাবিবাত্তেই জেদঅ সিদু ত্যা তা হুরোলআন পেলঅগোই।
ত্যা তা হুরোলআন পেবার পরে হুব হুজি উইয়্যে। সে পরেত্তুন ধুরি ত্যা গুরো শ’বোরে আর সন্দেহ নহ গরে।
বরঙ ত্যা দিঘিলঅ, বা চিদে গুরিলঅ। গুরো শ’বো দ বুউত গম! তারে দঅ চুরঅ ধক ন লাগে। তা কধা কঅনা.আহদানা. মুঅ ভাবসাব বেক্কানি ত্যা গম চোঘে দেঘা শুরু গুরিলঅ।
চিগোন শিক্কেমুলক এ গল্পবোর মানে অহলঅদে আমি আমা মনগজা গুরিনেই বেক চিদেআনি গুরি। আমি মনঅত আমনঅ ধুক্কেন চিদে বানি থেইনেই কারঅজনঅরে মাবি বা তারে আমনঅ চিদে ধগে চিদে গুরি। আমি কারঅরে সেনোত্তই বিচ্চেচ বা অবিশ্বাস জেই, কারঅরে ত্যা জিদিক্কেন নয় সিদিক্কেন চিদে গুরি।
আমা হিল চাদিগাঙঅ রাজনীতি কধাইও ধুরি! আমি দি দ’লে তিন দলে কুজ্জ্যা বাজেই চিগোন কনঅ সমস্যাত্তেই। মরামরি মারামারি গুরিদেই সন্দ বা সন্দেহ গুরিনেই।
আরোগ্গো গল্প কধা ইওত কঙঅর। একজনে মাস্তর এলঅ। ত্যা এগ্গান বিদ্যা শেঘেদঅ। ধরা জোক সিআন গুপন বা গোপন বিদ্যা। ত্যা নিজেই নিয়ম বানেদঅ, শৃঙ্খলা থিগ গত্তঅ। আর যারা বিদ্যা শিঘা এদাক তারারে ত্যা সে নিয়মআনি কড়া গুরি পালেবার কদঅ। ত্যা শাস্তি দি’দঅ দড়মড় গুরি।
হালিক ত্যা দোরেদঅ, কনঅজনে তাত্তুন বেচ বিদ্যা শিঘিএ অহবঅ কি না। সেনোত্তেই ত্যা সতর্ক সজাগ গুরি থেদঅ। ত্যা দোলে দালে বিদ্যা শিক্ষ্যা শেঘেই ন দি’দঅ। জিবে তা উগুরে বা তাত্তুন বেচ শিক্যা লঅদঅ বা পারিদঅ বা পারিবার চে’দঅ সিবেরে ত্যা নানা বাবত্যা গুরি থ্যাগেবার চে’দঅ।
সিদিক্কেনগুরি তার দিন কাদিলঅ। তার বুউত শত্তুর অহলাক।
এ গল্পবোর এগ্গান শিক্যা অহলঅদে, একজনে জুনি আরঅগ জনঅরে শত্তুরঅ ধুক্কেন গুরি রিনি চাই, আর সেনজান গুরি তাল্লোই আচরণ গরে, বেবঅআর গরে তোইলে একসময় জ্যা বা জি’বে তারে বল দিবার কধা বা সহযোগী অহবার কধা কাইকুরে থ্যাবার কধা সিবে একসময় হয়তঅ তার শত্তুর ওই জাই বা শত্তুরঅ ধুক্কেন ওই জাই।
অকারণে সন্দ বা সন্দেহ গুরিনেই কারঅরে শত্তুর বানেনেই কী ই বা লাভ?!
যে লেঘাআনঅত্তুন এ লেঘাগান লিঘিবার উচ্চো পিওঙ: সিআরআই
But the fable ends with this: If you see the other guy as a potential rival and deal with him accordingly, you will turn a possible partner to a possible enemy.

লি চুমিঙে ভুদঅত্তুন স্যান্ডেলঅ বাড়ি হেলঅ

চিঙ নাঙে রাজা বংশঅর আমলঅত চীন দেজঅত সিনচেঙ নাঙে এগগান শঅরঅত এগগো মেজিসটেরেত এলঅ।  তার এগগো পো এলঅ। তা নাঙান এলঅ লি চুমিঙ। ত্যা হুব সাহজবলা এলঅ। ত্যা কিজু ন ডোরেদঅ।  তারার এগজন থাউইয়্যে কুদুম এলঅ। সিবে নাঙান ওয়াঙ চি লিআঙ। ওয়াঙ চি লিআঙঅর যে এগগান বড় ঘর এলঅ সিওত অমহদঅ বেচ ভুদ থেদাক ভিলি মানজে কোআকোহি গত্তাক।
লি চুমিঙ-এ এগবার সে বড় ঘরঅত বেড়েবাত্তেই গেলঅ।  তারে দিঘিনেই ওয়াঙ-এ ‍হুব হুজি অহলঅ। ত্যা তারে কঅলঅ-’আমা এ ঘরঅত তুই বেড়েবাত্তেই ইচ্চোচ শুনিনেই হুজি উইওঙ। ইদু তুই গাই গাই ন থেচ। ত সমারে তরে রেদোত সাঙেত দিবাত্তেই এগজন মানুজ পাধেই দিম। ‘ হালিক লি চুমিঙে তারে কলঅ, না না, মত্তুন সাঙেত র লাগিবঅ। মুই গাই থেই পারিম।। মত্তুন এ গরমঅ দিনওত গাই গাই থাগত্তে হুব গম লাগিবঅ। ইদু হুব হোলামেলা জাগা আঘে। চেরোকিত্তেত্তুন বুইয়্যের বাই। বারে বুইয়্যের হেই হেই থাগত্তে হুব গম লাগিবঅ।
তাত্তুন ভজমান গাই গাই থেবার পরানে কঅর। আর তাত্তুন ভুদ চেবার হুব পরানে কঅর। সেনোত্তেই ত্যা ওয়াঙঅরে সে কধাআন কুইয়্যে।
ওয়াঙেও আর কনকিজু ন কঅলঅ।  ভুদ কধাআন তুলিবার চেইনেইও আর ন তুলিলঅআর। দিন থাগত্তে ত্যা কামমো মানজোরে দিনেই ঘরঅ গুদি থিগথাগ গুরি দিলঅ। দোলে গুদি কাজেনেই ‍ঘুম জেবার বেবস্তা গুরি দিলঅ। সে সমারে সাচ সাচ অহদে সলাত বাত্তি জালেই দিনেই ত্যা তা আরেগ্গান থাইদে ঘরঅত জেলঅগোই।
ইন্দি লি চুমিঙে সাচ সাচ অহবার পর এগগো বাত্তি লোইনেই ঘরঅ চেরোকিত্তে হানঅক্কন গাই বেড়েই চেলঅ। ঘরআনঅ চেরেকিত্তে হালি জাগা বুউত আঘে। গাজবাজঅ কম। সেনোত্তেই চেরোকিত্তেত্তুন ফাগুনঅ বুইয়্যের এজে।  রেদোত রেদোত ত্যা এগ্গান জাগাত বুজিলঅ। চেরোকিত্তে কনঅজন নেই। কনঅ সারাশবদও নেই।  আস্তে গুরি আগাজঅত চানআন উদা শুরু গুজ্জে।  লি চুমিঙঅত্তুন এক্কা এক্কা ঘুম এজঙ এজঙ গরের। ত্যা ঘরঅ ভিদিরে সুমিলঅ। তারপরে গুদিত সুমি ঘুম জেবার জাগাত গেলঅ। ঘুম এত্তে সলাত ত্যা শুনিঅঅ হাঙদক দুরঅত কি েএগ্গগো লরের। থচ থচ গরের। গমে চেইনেই এক্কা এক্কা জুনঅ পঅরঅত ত্যা দিঘিলঅ টেবিলঅত ত্যা চা হেইনেই যে কাপপো রাঘেইয়্যে সিবে গাই গাই উগুরে উদানা শুরু গুজ্জে। সিবে গাই গাই পাক হেইনেই ঘুরা শুরু গুজ্জে। ইআন অন্য মানজে গাই গাই এগ্গান ঘরঅত দিঘিলে মুজজো জেবার অক্ত অহলাক্কুন। হালিক ত্যা এককেনাও ন ডোরেলঅ। চা কাপপো হাঙদক বাদে গাই গাই ঘুরানা থামিলঅ। সে পরে জিওত পোইরাক জালা উইয়্যে সে পততো উগুরে গাই গাই উদিনেই ঘুরানা শুরু গুরিলঅ। ত্যা সিন্দি হানক্কন রিনি চেই থেলঅ।  পোইরাকঅ পততো গুদি উগুরেন্দি হাক্কে ইন্দি হাক্কে উন্দি গাই গাই বেড়ানা শুরু গললঅ।
লি চুয়ােঙে সিআন চাআদে চাআদে কি গললঅ, সিন্দি চেইনেই চোক রাঙা গুরি কঅলঅ, ‘ভুদতো, তুই দ ভজমান বেচ গরর। মরে তুই ডর লাগেবার চত্তে, মরে তুই চিনঅচ? মুই কনঅ ভুদ ন ডোরাঙ সিআন তুই হবর ন পাচ?’ ইআন কোইনেই ত্যা বিচ্চোনওত্তুন একফাল দিইনেই ভুদতোরে ধুরিবাততেই গেলঅ।
ইন্দি ত্যা পিননেদ্যা কাবর চুবর কক্কে হুলি জিএগোই সিআনঅ মুক্কে তার হেআলঅ নেই। ত্যা কিএত কনঅ কাবর চুবর ন পিনিনেই ভুদতোরে ধরার চেরেত্তা গললঅ। ত্যা পোইরেক পততো মুক্কে জেইনেই ভুদতোরে ধুরিবাত্তেই গেলঅ। হানক্কন বাদে পেইরেকঅ পততো টেবিলঅত গাই গাই বুজিলঅ। ত্যা সে পোইরেকঅ পততো ধরা গেলা।
ধরা জাদে সলাত ত্যা থারেলঅ তারে কননা জানি তা বাঙ গালঅত এগেগো বড় ড়ুরি চুওর মারিলঅ। ভুদতো তারে চুওর মাজ্জে ভিলি ত্যা থারেলঅ। চুওর হেবার পরে ত্যা থারেলঅ, তা কিএত কনঅ কাবর চুবর নেই । তরাতাঙরি ত্যা বিচ্চোনওত্তুন কাবর চুবর আনিনেই পিনিলঅ। তারপর ত্যা ঘর দোর হুলিনেই বড়ে গেলঅ।  কুরে যে কামমো মানজো ঘর এলঅ তারে জাগেলঅ। তাত্তুন ত্যা এগগো বাত্তি আনিলঅ। বাত্তিবো জালেনেই ত্যা তা স্যান্ডেলআনি তোগা শুরু গুরিলঅ। হালিক এগ্গান স্যান্ডেল প্যালেও ত্যা আরেগ্গান স্যান্ডেল তোগেই ন পেলঅ।
রেত্তোবো ত্যা আরঅ বাত্তি মারেনেই ঘুম গেলঅ।  ভুদতো হালিক আর তা মুজুেঙে ভেদা ন দিলঅ আর। ত্যা বিন্নে পঅর অহয় সঙ ঘুম গেলঅ।
ঘুমঅত্তুন উদিনেই ত্যা গুদিবো দোলে রিনি চেলঅ। ত্যা দিঘিলঅ গুদিবো উগুরে চালঅ এক কিত্তে েএগগো কানা স্যারে তা স্যান্ডেলআন ধুলি ধুলি আগে। আর তা কুরে জে কামমো মানুচচো এলঅ ত্যা হেআল গুরিলঅ, লি চুমিঙঅ বাঙ গালঅত স্যান্ডেলঅ বারি ছবি ধুক্কেন লাগি আগে। তারা বুজিলাক, ভুদতো রেদো মাই লি চুমিঙঅরে তা নিজঅ স্যান্ডেলওই বাড়ি মাজজে।
মনেঅয় ভুদতো তারে কিচচু গুরি ন পারিনেই স্যান্ডেলঅ বাড়ি দিইনেই সে ঘরঅত্তুন জনমঅত্তেই ধেই জিএগোই। সে পরে আর সে ঘরঅত ভুদ দেঘা নহ জাই আর।