Saturday, October 26, 2013

ডেলও বুদ্ধি আর চোলও বুদ্ধির হারা!

মুই ম লেঘাআনঅর হেডিং দোঙ- ডেলও বুদ্ধি আর চোলও বুদ্ধির হারা! লেঘাগান বাংলাদেজঅর চলেত্তে পলিটিক্যাল অবস্তা লোনেই।
২৫ তারিগ' পরে বাংলাদেজঅর পলিটিক্যাল অবস্তা অন্যধুক্কেনগুরি বুদুল্যে। আওয়ামীলীগ সরকাজ্যার মেয়াদ ২৫ অক্টোবর ফুরেইয়ে। ইক্কে তারা ইলেকশনঅ কাউন্টডাউন চলের। এ সময়অত এইনেই ওপোজিশনঅ নেতা হালেদা জিয়া ডিকলেয়ার গুজ্জে যে, যে সরকার আঘে সিবে অবৈধ, অর্থাৎ ইললিগেল। হালেদা জিয়া গ্যাল্লে ২৫ তারিক ঢাকা সোহরাওয়ার্দী উদ্যানঅ জদামেলাত এ কধাগান কুইয়ে। সে পরে ত্যা ৬০ ঘনতার এসত্রাইক ডাক্কে।

ইন্দি, দিএকদিন আগে কোনো এগ্গান জাগাত সরকারঅ নেতা সুরনজিত সেনগুপ্ত কুইয়ে, যে, প্রধানমন্ত্রী শেখ হাসিনা যে কুনঅ সময় হালেদা জিয়ারে ফুন গুরি পারে। সিআন লোনেই সুরনজিতে আগ বাড়েনেই কধা কুইয়ে কিনে সরকার দলঅ নানা জনঅত্তুন কধাও শুন্যে ভিলি কোই পারা জিএ(লিংক- বিডিনিউজ২৪.কম)। কিন্তু ইচ্চে(২৬ অক্টোবর, ২০১৩) বিল্লে সাজন্যা মাদান ঘিচ্চেক ঘিচ্চেক গুরি প্রধানমন্ত্রী শেখ হাসিনালোই বিরোধী দলঅত নেত্রী হালেদা জিয়ার কধা উইয়ে।
এ কধাবাত্তাত শেখ হাসিনা হালেদা জিয়ারে তার ৬০ ঘনতার এসত্রাইক বাদ দিবাত্তেই কোজুলি গুজ্জে আর ২৮ তারিক গণভবনঅত রেদোত হালেদা জিয়ারে ভাত হেবাদ্দেই নিমনত্রণ গুজ্জে।

শেখ হাজিনা আর হালেদা জিয়ার এনজান গমে কধাবাত্তা কনা দেঘিনেই ব্যাগে আঝা দেঘদন। আমিও দেজঅর গম আঝা গুরি পারি। আঝা গল্লে হতি দ নেই।

হালিক, ইওত এগ্গান রাজনীতি দেঘা জা'র! 

মত্তুন যা মনে উইয়ে সিআন লেঘঙর-

 ১. শেজেনদি আজলে সুরনজিতঅ দেলঅ পলিটিক্স হাদিলঅ বিরোধী দলেও সে পলিটিক্সঅত পুরিনেই ইক্কো বললো তা কোর্টঅত আনিলঅ। ইক্কো, হালেদা জিয়া জ্যোপ দি পেবঅ! হালিক ত্যা বা বিরোধীদলে কি রেডি?
আজলে সরকারঅর বর্তমান অবস্তারে বিরোধীদলে কোন জাগাত নেজেবঅ সিআন লোনেই চিদে এবঅ থিদির থাদার। তারা চিদে গরদন, বেচ ঝামেলা বাজেবার চ্যালে তারা ন পারিবাক। বরং থুগুরিউনোর দবদবা বাড়িবার সম্ভাবনা আঘে।

বরং নির্বাচন গুরিলে তারা তিগি থেবাক। তারা সরকারঅতঅ জেই পারিবাক।

২. সরকারে ইক্কো চা'র তারে নৈতিকভাবে যে 'অবৈধ সরকার' ভিলি বিরোধীদলে বানেবাত্তেই চা'র সিআন তারা ফিরন্দি চালান দিনেই জুনি নিজরে নৈতিকভাবেও বৈধ সরকার দাবি গুরি পারন তবে তারা র কাম গরদে সুবিধে অহবঅ। সেনত্তেই শেখ হাজিনা হালেদারে ফুন গুরিলঅ।

৩. হরতাল দাগিবার আমেজ ইক্কে জেনজান আঘে, সিআন অহলদে ভজমান দড়মড়। ইক্কে বিরোধীদলে সিআনঅত বেচ গুরুত্ত দ্যে। ইক্কে সরকাজ্যা জুনি তেম্বাঙঅ নাঙ গুরি এক্কেনা অহলেও বিরোধী নেতাকোরমীউনো ভিদিরে দড়অ মনআন নরম গুরি দি পারে তোইলে সরকারঅর লাভ। শাানদি ব্যাগে চান।

৩. আজলে দোনো পক্ক চেরেত্তা গরদন যে, মানজো সিদু আর বিদেজঅ সিদু তারা জাতে নিজঅ ভাবমুরতি গম রাগেই পারন।

কয়েকদিনঅ ভিদিরে কী ওই পারে? 

# # ইআন দেঘা যায়, গমে নির্বাচন অহলে এ অবস্তাত আওয়ামীলীগে ন জিনিবঅ।  আর নির্বাচন তা অধীনে গুরি পারিলে ত্যা কিজু এগ্গান গুরিনেই তিগি থেবার চেরেত্তা গুরিবঅ। ত্যা যে কুনোভাবে অহলেও অহয় সরকারঅত তেই বা অন্যভাবে নানাধুক্কেন গুরি জিনিবার চেরেত্তা গুরিবঅ।

### বিরোধী দলে দ সিআন অহবাদ্দেই ন দিবঅ। তারাও চেরেত্তা গুরিবাকে জেকুনোভাবে নিরবাচনঅত জিনিবাদ্দেই। হালিক ইক্কে সরকারে জে অবস্তাত আঘে বা প্রশাসন যে অবস্তাত আঘে সে কারণে নিরবাচনঅত জিনদে তার কঠিন অহবঅ।

#### তারে চেরেত্তা গুরি জেবাক নানা ধুক্কেনগুরি এগে অন্যরে নরম বা দুরবল গুরিবাদ্দেই।

##### অরতাত যে ড্রিবলিং পলিটিক্স চুলিবঅ। (হবরঅত দিঘিলুঙ, ২৮ তারিক শেখ হাজিনা জে নিমনতরন গুজ্জে সিওত হালেদা জিয়া ন জেবঅ। কারণ সে দিননোত এসত্রাইক। দাঘিলে ২৯ তারিক জেবঅ)

অরতাত আমি আরঅ কয়েকদিন সং রিনি চেই থেবং। কী অহয় সে পরে হবর পেবঙ! 
তবে, দেলও পলিটিক্স যে এবঅ হাদে বা এবঅ দেলও পলিটিক্সই জে ফ্যাক্তর সিআন ইচ্চে সং দেঘা গেলঅ। চোলও পলিটিক্স এবঅ গম কিজু গুরি ন পারের!


(লেঘাগান লিঘিলুঙ চাঙমা ভাচঅন্দি। মনঅ কধা অত্তে অত্তে নিজঅ ভাচঅন্দি কনা দরকার! মুই 'জানিয়্যে' হোলেবাদ্দেই এ লেঘা নহ লেঘঙ। বানা চাঙমা ভাচ চয্যা বা চজজা গুরিবাদ্দেই লিঘিলুঙ) 




No comments:

Post a Comment