ইবে এগগো ভুদঅ গল্পঅ বা পজ্জন। চীনঅ ভুদঅ পজ্জন। পজ্জননোত লেঘা আগে, তাই তুঙ উয়ান নাঙে একজনে তা আজুত্তুন এ পজ্জননো শূনন্যে। তা আজু শুনন্যে আরঅ তা আজুত্তুন। ইঙিরি সে আজুবো আরঅ শুনন্যে তা আজুত্তুন। কোই পারা জাই, পজ্জননো ভালক বজর আগঅর। একুনে চের পাচশত বজর আগঅর অহবঅ এই পজ্জননো। সিওত লেঘা আগে ভালক বজর আগে তাই তুঙ ইয়ানঅর গেআদি(জ্ঞাতি) এগজনে একবার শঅরঅত বেড়েবাত্তেই জিইয়ে। সিদু ত্যা মানজে ন থানদে এগ্গান ঘরঅত রেত কাদেই পিইয়্যে। যে ঘরঅর ত্যা এলঅ সিআন এলঅ সারা ঘর। সিওত কনঅজনে নন থেদাক। মানজে কধাক সিওত এগগো ভুদ ভালক বজর ধুরি থেদঅ। মানজে সিওতত থ্যালে ভুদতো তারারে ডর লাগেদঅ। মানজে ডরে সিওত ন থেদাককোই। হালিক তাই তুঙ ইয়ানঅর এ গেআদি মানুজচো ভুদপেরেত কিচ্চুই ন ডোরেদঅ।
ত্যা সে ঘরআনঅত বিল্লে বিল্লে পরঙ উইয়্যেগোই। তারপরে ত্যা সিওত বিচ্চোন বেজেনেই ঘুম জেবার বেবস্থা গুজ্জে। রেদ অহদে অহদে ভালককন পর জ্যাক্কেনে তার ঘুম এজঙ এজঙ অহর স্যাক্কেনে ত্যা দিঘিলঅ ভুদতো ঘরঅ ভিদিরে ইচ্চে। ভুদতো এইআই তা কিয়্যেআন ফুলােনা শুরু গুজ্জে। হানককন পরে ত্যা দিঘিলঅ ভুদতো ঘরঅ চালঅ দেগেনঅ সঙ লাম্বা ওই জিএগোই। তাই তুঙ ইয়ানঅর গেআদিবো ভুদতোরে ন ডোরেনেই ত্যা চেরাগগো জালেনেই ভুদতোরে চাআনা শুরু গললঅ। ত্যা দিঘিলঅ, ভুদতো ভুজুমো ওইনেই তারে ডর লাগেবার চাআর। আর ভুদতো তারে অমহদঅ রাগ ডেগেনেই কলঅ, তুই ভিলে মরে ন ডরাচ, তুই ভিলে ভুদ ন ডোরাচ?
তাই তুঙঅ গেআদিবো ভুদঅ কিত্তে রিনি চেইনেই কঅলঅ, না দ ন ডোরাঙ দঅ।
ভুদতো সিআন শুনি আরঅ রমসমঅ রাগ ডেগেনেই নাগঅনদি বনবন নিজেচ সারিলঅ। মুওততুন আগুন বাইর গুরিনেই তারে ডর ডেগেনেই কঅলঅ, ইক্কে মরে চাআ। এবঅ মরে তর ডর গরেদে ধুক্কেন ন লাগে??
তাই তুঙঅ গেআদিবো কঅলঅ, আ কোই, তরে দ মুই এক্কেনাও ন ডোরাঙঅর! তরে দ মত্তুন ডর গরে পারা ন লাগের।
সিআন শুনিনেই ভুদতো আমক অহবার অবস্তা অহলঅ। এধক বজর সঙ ত্যা দিঘি ইচ্চে মানুচ্চনে তারে দিঘিলে মাত্তর ডরে কী গুরিবাক কী ন গুরিবাক অহন, তারা ডরে মুজজো জেবার অক্ত অহয়। আ এ মরনঅ মানুচচোরে এধক ডর দেঘেবার চেরেস্তা গুরিনেইও তারে ত্যা ডর দেঘেই ন পাললঅ।
ত্যা এক্কা এক্কা লাজানা শুরু গললঅ। তাই তুঙ অর গেআদিবোরে ত্যা পিঠ পোচচো দোঙ দোঙ গুরি কঅলঅ, আ তুই দ ইচ্চে মরে লাজঅত ফেলেলে। মুই দ লাজে কুদু মুক লুগেই রাগেম কোই ন পারঙঅর।
ভেই, তুই মরে এক্কেনা এ লাজঅত্তুন বাজাআ। মরে ন ডোরেলেইও এক্কেনা ডোরাঙ ডোরাঙ ভাব গরনা! ইধিক্কেন গুরি তরে ডর ভোরেই দি ন পারিলে দ মঅর মান সম্মান ন থেবার অকতঅ অহবঅ!
তাই তুঙ অর গেআদিবো সিআন শুনিনেই কলঅ, মুই তরে ন ডোরেলে তরে ডোরাঙ ডোরাঙ মুও গুরি ন পারিম।
ভুদতো তা দি আহত জুড় গুরি তাই তুঙঅর গেআদিরে সেলাম গুরি আরকবার কুজুলি গুরিলঅ, ত্যা জ্যাআন তারে ডরাই পারা গরে। হালিক তাই তুঙঅ গেআদিবো ভুদতোরে পাত্তাই ন দিলঅ।
এ অবস্তা লাআপ পেইনেই ভুদতো ভজমান অগমান পেলঅ। ত্যা নিজঅ মনে মনে কঅলঅ, এনজান আগাত্যা রকবেঙা তাইপঅর মানুচ মুই েআর নহ দেঘঙআর। ন আরিবো আর! ইদু থেই ন আরিবোআর! মত্তুন এ ঘরঅত্তুন ধেই জা পুরিবগোই। এনজান শতান মানুচ্চোই থেই ন পারিবো। ইআন কোইনেই ভুদতো ব’নিজেচ ফেলেইনেই বুইয়্যেরঅত মিঝি গেলঅ। সিত্তুন ধুরি সে সারা ঘরআনঅত আর ভুদতুদ কিজু দেঘা নহ জাই আর।
