বাঘেইসুরি পিসিপি প্রোগ্রামঅত কিল্লেক এতন গুজ্জোঙ। সিদু হাঙদক বক্তব্য
রাঘেইওঙ। বাঘেইসুরি রুপকারি ইশকুলঅ মাধঅত এ অনুস্তানআন চুল্লে। সিওত
৪০০/৫০০ গুরো-ইসতুডেন-বুড়ো এতন গুজ্জোন। সিওত পিসিপি ২১ জনঅর এগ্গো কুমিতি
বা্নেইএ।
সে মিতিঙঅত মর কধা কবার পালা এলে মুই, চাঙমা কধানদি কিজু কধা কুইওঙ। সে পরে বাঙাল ভাচঅনদি কধা কুইওঙ।
মুই কুইওঙ, এই যে, বাঘেইসুরি, ইচ্চে তুমি যে জাগাআনিত আঘঅ সিআনিত আমা
পূর্ব পুরুষউনে বা আমা বাপ-দাদা দাঘি বজত গুজ্জোন কাপ্তেই গধাআন অহনার পরে।
যে জাগা বা বিলউনোত ইচ্চে তুমি বজত গুরি আঘঅ, সে বিল বা জাগাআনিত আমা বাপ
দাদা দাঘি পোল্লেম জ্যাক্কেনে ইচ্চোন, স্যাক্কেনে এই জাগাগানিত
সাপ-বাঘ-ভালুক সুমুত্তো বিজবলা-ঝারবো পশু-পক্কী এলাক। এই থল জাগাগানিত,
জিআনিত ইক্কো ভুই গুরি মানুচ্চুনে ধান পাদন, সিআনিত এলঅ তারুম বন। সিআনি
জারুল গাজ-বাজঅ বন এলঅ। স্নেহকুমার চাঙমা তা বোইবোত এ কধাগিানি লিক্কে।
সে পরে মু্ই বুদ্ধ যে সপ্ত অপরিহানীয় ধর্মর কধা কোই জিএ, সিআন শুনেলুঙ।
ত্যা কুইুয়ে, সে জাদঅরে বা সে দলঅরে কনঅজনে বা কনঅ শক্তিএ ধ্বংস গুরি ন
পারিবঅ যে জাততো এই ধর্মআনি পালেবঅ।
ত্যা কোই জিএ, মিতিঙঅত বা সভা বা তেম্মাঙঅত যারা এগত্তরে বজন, যারা
এগত্তরে মিতিঙ শেজ গুরি হাজিরুজি গুরি উধি জান, অরথাত যারা মিতিঙঅত
কোলকুজ্জে ন গরন, এগত্তরে বুজিনেই তেম্মাঙ সুল্লুক গুরিনেই একসমারে এগ্গান
সিদ্ধান্ত লোই পারন, যারার বা যে দল বা যে জাদঅর এই গুণআন আঘে সিবেরে
কনঅজনে থেগেই রাঘে ন পারন বা তারে পরাজিত গুরি ন পারন।
ত্যা বা ভগবান বুদ্ধ কোই জিএ, মিতিঙঅত গোপন সিদ্ধান্ত লবার পরে শত্তুরে
সে সিদ্ধান্ত হবর ন পাই, কনঅজনে সিআনি শত্তুরঅরে কোই ন দোন, এ গুণআন যে দল
বা জাদঅর থেবঅ, সে দল বা জাদঅরে কনঅজনে ধ্বংস গুরি ন পারন।
যে দল বা জাদে মিলেরে, গুরো, বুড়ো-বুড়ি, মাদিবুলি ন পাাজ্জেউনোরে তারা
ধগে মর্যাদা দি জানে, তারারে নাকাচ ন গরে সে দল বা সে জাদঅর উন্নতি অহয়,
উজন্দি যায় তারার সমাজ।
যে দল বা জাদে তারা জাদঅর বিদ্যাবলা, বুদ্ধিবলা, জ্ঞানী-গুণী, সাহজী,
বীর মানেইউনোরে সম্মান গরে, মর্যাদা দ্যা সে জাদঅরে কনঅ জাদে ধ্বংস গুরি ন
পারে।
যে দল বা জাদে তা জাদঅর পুরোনি গম নিয়মআনি , আল্যাক(সংস্কৃতি) পালন গরে সে দল বা জাদে তলে ন লামে, জায় উজনি।
এই নিয়মআনি যে দল বা জাদে পালন গুরিবঅ সে দল বা জাদঅরে কন্না আঘে ধ্বংস গুরিবার, বুরুচ তুলিবার?
সমাবেজঅত কোলুঙ, মু্ই কি ধর্মরে তুমি জেনজান গুরি পালঅ সেনজান গুরি
বিচ্চেচ জাঙ? না, ন জাঙ। বুদ্ধ এলঅ এগ্গো জ্ঞানী- মুণি মহা পুুরুষ। তারে
সেনজানগুরি দিঘিনেই তা কধাগানি মুই বিচ্চেচ জাঙ। ত্যা দ জোর গুরি বিচ্চেচ
জেবার কিজু ন কয়। ত্যা বানা কুইএ শর্তর কধা।
সে পরে কোলুঙ, আমি আমা জাততো সেই নিয়ম কি পালেই? আমি দ সাধারণ আদামঅ মিতিঙ গুরিলে কোল ব’দে, কুজ্জে বাজেই।
আমি দ আমা ভিদিরে কধা গোপন কধা ফাস গুরি। ফেসবুকঅতঅ দ সিআনি অনসুর দেঘা যায়।
কোলুঙ, স্নেহকুমার চাঙমা, য্যা, শান্দিবা্ইনীত এলঅ তার জুনি জাদঅ সিদু
কিজু অবদান থেই থায়, তোইলে তারে দ আমাত্তুন সম্মান গরা পুরিবঅ, মর্যাদা দিআ
পুরিবঅ।
বানা সন্তু লারমারে গুবিলে কি জাদঅর ভালেদি অহবঅ? আমা ভিদিরে যে, সেই
‘সন্তু লারমা’র বজঙআনি আঘে,সিআনি জুনি আমি ন কাজেই তারে গুবিলে কি সমাধা
অহবঅ? সন্তু লারমা ধুক্কেন একবুচ্চে বা যিআন বুজঙ এগাহরা বুজঙ, এক ন জিনে
নুত্যা সমারে, েএক ন জিনে ঊত্তে সমারে সেনজান অহলে কি অহবঅ? মনঅ ভিদিরে
সন্তু লারমা দ আগে। তারে গুবি বা বজঙ কোই। অথচ, ম মনঅ ভিদিরে দ জে সেই
সন্তু লারমা আঘে!
আরঅ ভালক্কানি কধা কুইওঙ। আজলে কধা কোইনেই কী অহবঅ! ? জুনি আমি কামে করমে আক্কোই জেই ন পারি তোইলে কধা কোইনেই কী অহবঅ!
No comments:
Post a Comment